Hvað er einhverfa?

Hvernig er að vera einhverfur einstaklingur sem fær einhverfugreiningu um miðjan aldur og uppgötvar líf sitt allt í einu á nýjan hátt?

Hugmyndin um þessa síðu kom út frá því að reyna að svara þessum spurningum út frá mér og deila með mínu fólki. Í von um að fá einhvers konar skilning frá þeim á því hversu ólíkur heimurinn minn getur verið miðað við þeirra upplifun.

Bæði með því að segja frá mínu lífi, upplifunum og uppgötvunum, en líka með því að deila því sem ég læri frá öðrum einhverfum einstaklingum m.a. í gegnum youtube, podcast, og annað útgefið efni.

Allir einhverfir einstaklingar eru ólíkir, alveg eins og allir sem eru ekki einhverfir eru ólíkir. „Ferðin mín“ fjallar um mínar upplifanir á heiminum, en á ekki að túlka sem heilagan sannleika um alla einhverfa einstaklinga.