Berskjölduð

Mér líður eins og ég sé opið sár, eftir að hafa „opinberað“ einhverfuna mína á facebook fyrir rúmum tveimur vikum síðan.

Ég hef ekki fengið neinar neikvæðar athugasemdir en mér líður samt eins og ég sé á einhvern hátt berskjölduð og ég er viðkvæmari fyrir öllu áreiti, líka því áreiti sem ég réð við áður. Það er eins og ég nái ekki að setja upp og halda grímunum sem ég hef notað allt mitt líf.

Þegar maður er með opið sár þá getur smá gustur verið sársaukafullur og þannig er staðan búin að vera hjá mér síðustu vikur. Smá gustur sem ég réð við áður er ég bara ekki að höndla núna.

Og jólin eru erfiður tími þar sem áreitið úr öllum áttum er margfalt.